政Whats噏：鐵窗生活難捱　何俊仁面容憔悴

日前被法庭撤銷保釋而還押候判嘅民主黨前主席何俊仁(AV仁)，連日來都有家人同朋友去收押所探監，AV仁嘅前黨友今日(22日)透過社交平台交代佢嘅鐵窗近況。話說AV仁被囚於一個只有細小出風口嘅單人倉，初期成晚都瞓得唔好，以致面容憔悴。

其實AV仁較早前仲有一單官司，就係指佢涉及前年8月18日流水式集會，上個月被法庭裁定組織及參與未經批准集結兩項罪罪成，判囚12個月但緩刑兩年，儘管AV仁獲得緩刑惹來唔少爭議，但就算避得過上次嘅牢獄之災，AV仁前年10月1日所干犯嘅組織及參與未經批准集結案，就無咁易走得甩喇。據悉，AV仁初入收押所嘅時候，胃口欠佳，輾轉難眠，面色就梗係難睇。佢嘅前黨友話，AV仁目前嘅情況還可以，之不過，一個年近70歲嘅老人，曾動過兩次手術，又患過癌症，遇上監獄嘅環境，肯定唔好過。又指近日AV仁都只係食青菜同稀粥果腹，但面色已經比前兩日要好。