政Whats噏:4成離婚人士遇贍養費「拖數」 議員狠批政府耍太極

20210526
東網電視
更多新聞短片
不少單親家庭依靠贍養費過活。
就算夫妻緣盡,都有責任向前伴侶支付贍養費,但現實情況係唔少單親家庭因贍養費「拖數」而面臨經濟困境。對於有意見建議港府應參考外國做法,設立贍養費管理局統籌有關事宜,有關當局就搬出諸多理由,包括以數據聲稱離婚人士唔需要贍養費、話申請人未有利用法律程序追討欠款等,有議員狠批政府回應係耍太極4式,完全無意解決問題!
議員葛珮帆(EQ)今日(26日)引述政府統計處於2015年嘅調查,指有大約4成離婚人士未能全數收取贍養費。另外又有約9成被拖數嘅人士,因程序太繁複以及追討過程曠日持久,無奈放棄法律行動追討欠款。EQ話好多單親媽媽對佢「一路講、一路喊」,話礙於「時畀時唔畀嘅贍養費」,必須外出謀生以應付生活開支,但當擁有些少資產又申請唔到綜援。雖則話可以透過法律程序追討拖欠嘅贍養費,但佢哋根本冇餘錢打官司,反問點解前年反對修訂《逃犯條例》示威中受傷嘅「爆眼女」竟可輕易攞到法援。
民政事務局局長徐英偉,就同樣引述統計處喺2015年至2016年嘅調查,指期間約有36萬名曾經離婚或者分居嘅人士,當中大約8成並無打算申請贍養費。雖然有意見主張港府參考外國政府做法,設立贍養費管理局統籌有關事宜,徐就話政策有其利弊,擔心會向社會釋出錯誤訊息,認為有個局處理有關事宜,就可以逃避支付贍養費嘅責任。況且,外國嘅贍養費管理局,其運作所需嘅行政費高企,甚至要收取當中約2成嘅贍養費,政府正委託機構進行相關研究。
徐英偉發表回應後,另一議員謝偉俊則力數「局長耍太極4式」,包括指數據顯示離婚人士冇需要申請贍養費、現行制度有保障、「有一大籮法律程序,只係申請人唔做」,同埋已有研究程序。謝批評有關研究並非由政府執行,而係提交予家庭議會,先討論再研究,簡直係「耍完又耍」。議員容海恩則不滿徐局長嘅回應,令單親家庭「睇到好勞氣、眼火爆」,又話礙於照顧小朋友,單親家長好難搵工作,仲要佢哋進行煩瑣嘅法律程序,根本唔可能做到。