政Whats噏：反對增股票印花稅　張華峰努力游說表達不滿

政府喺新一份《財政預算案》中宣布將股票交易印花稅稅率，由買賣雙方各付0.1%提升至0.13%，有關嘅《2021年收入(印花稅)條例草案》將於下周三(6月2日)恢復二讀，一直反對草案嘅金融服務界議員張華峰(肥老闆)講到明會投反對票，儘管扭轉局面嘅機會唔大，但自己作為業界代表仍勉力四出拉票，務求爭取更多議員企埋同一陣線，向政府表達不滿咁話！

其實早前審議本年度財政預算案時，肥老闆就因為政府硬推上調股票印花稅而投下棄權票，嚟緊印花稅恢復二讀，肥老闆打定輸數，仲話政府明知佢會投反對票，都冇主動搵過佢傾，應該係知道一定夠票，懶得騷佢喎。

但肥老闆明知不可為而為之，話自己冇放棄㗎！仲周圍搵人支持，當日要投下反對嘅一票，向政府表達不滿。佢仲笑言，正努力逐個游說，話點都有一班經民聯兄弟支持，包括石禮謙同劉業強等，除此之外，都會努力向曾經表達過不滿草案嘅議員蔣麗芸，爭取反對嘅一票咁話！