政Whats噏：達成共識　行管會全體委員決定延任

立法會行政管理委員會任期將於今個月11日屆滿，當日嘅內務委員會將選出新一屆行管會成員。之不過，一班議員已經傾掂數，決定由全體委員延任喎。

立法會秘書處早前去信一眾議員，附上一份提名表格，選舉就會喺今個月11日進行。其中一名現任委員向東網透露，喺尋日(2日)召開嘅建制派例行會議上，大家已有共識傾向全體延任。因為選出新一屆嘅委員任期同佢哋嘅議員任期一樣，只係得番幾個月，而行管會主要都係負責管理立法會行政管理設施，如因應議會狀況而增購保險、增聘人手等，既然事件冇咩爭議，相信都唔需要特別協調新人選，所以決定齊齊再坐一會喇。

事實上，行管會成員包括立法會主席、內務委員會主席及副主席，同埋最多10名互選產生嘅議員。現屆委員包括梁君彥、李慧琼、馬逢國、石禮謙、黃定光、陳克勤、陳健波、葉劉淑儀、謝偉俊、易志明、麥美娟、鍾國斌同埋吳永嘉。