政Whats噏:議員質疑港府創科成果 斥銅芯口罩是失敗的亮點

2021年06月04日 18:14
東網電視
更多新聞短片
多名議員狠批銅芯口罩好失敗。
香港嘅創新科技發展屢被批落後於鄰近地區,立法會財務委員會今日(4日)通過喺創新及科技基金提供47.5億元追加撥款。不過,多名議員舉例狠批政府自身嘅創新水平令人質疑,例如將銅芯口罩包裝為亮點項目,實質就係失敗嘅亮點項目。同時亦批評政府提供嘅安心出行、智方便等流動應用程式為人詬病。
議員葉劉淑儀批評安心出行、居安抗疫同埋智方便流動應用程式並唔方便,唔單止市民投訴,有行政會議成員更加需要耗花半個鐘研究,而最新喺安心出行儲存電子針卡嘅功能亦好麻煩。然而創新及科技局局長薛永恒為自己嘅出品好自豪,大晒安心出行至今已經有440幾萬嘅下載量,會精益求精不斷優化程式喎。
旅遊界議員姚思榮就批評政府推出銅芯口罩係重點項目,但佢自身使用過認為較麻煩,「洗一次就縮水」,根本唔可以用60次。另一議員鍾國斌話自己忍唔住發言,直斥銅芯口罩係失敗嘅亮點,薛永恒係其中一個好捧場嘅官員,再者就係環境局局長黃錦星,之後再冇主要官員使用。不過鍾都冇氣講,之後就話「過咗去嘅事,算啦」。
銅芯口罩受唔受歡迎?金融服務界議員張華峰指出,使用銅芯口罩嘅市民寥寥可數,而生產力促進局研發嘅無觸按鈕目前只係喺50個地方安裝,立法會亦只有一部升降機有安裝設置,話市民好難體現創科帶嚟嘅好處。議員容海恩仲話相信立法會同事都可以感受到「挨埋啲就會撳晒成排掣」,希望可以完善本港創科,就唔會畀人笑喇。
身兼行政會議成員嘅議員林健鋒批評政府運作僵化,例如喺竹篙灣檢疫中心以價低者得嘅標準選用差劣嘅膳食。佢又話港府喺口罩短缺時話希望資助本地生產後,唔再需要求人進口,但幾個月前又向越南買口罩,質疑港府「得把口講」,並唔支持香港再工業化。
局方繼續死撐,話已派出超過1070萬個口罩,又強調特別係基層家庭一直有需求,話唔同人有自身嘅考慮,唔可以一概而論喎。當局更加話有唔少地方向佢哋查詢,希望得到銅芯口罩嘅設計同詳細資料,仲有地方經過商業改動後進行生產添。局方認為唔單止可以協助唔同地方抗疫,同時肯定銅芯口罩嘅功效咁話。