政Whats噏：曾自鳴微服出巡街市　狂畀街坊問候

落街市買餸係市民嘅日常小事，之不過油尖旺區議員曾自鳴竟然形容自己落街市係微服出巡，同買餸嘅街坊傾談地區事情。佢今日(4日)又再出巡，竟然喺咁畀街坊問候。搞乜？

曾自鳴今日喺社交網站貼文，話朝早去大角咀街市出席端午節宣傳活動，向商戶同街坊派毛巾。佢話相信街坊都知，佢成日「微服出巡」去街市同街坊傾談地區事情。佢認為喺一個小小嘅社區，位於中心嘅街市，往往就係人情味嘅所在，希望可以多啲喺街市見到大家喎。

話說曾自鳴喺上個月尾入院，但冇透露病況，只係話自己開區議會會議後覺得唔舒服決定入院，醫生就話需要接受一啲檢驗，亦有一啲指數較高需要再作觀察先批准出院。佢今日微服出巡之後有感而發，話佢入院嘅消息喺好短時間已經傳遍整個街市，有唔少商戶同街坊向佢問候，認為消息喺街市流傳嘅速度快過社區其他地方。