政Whats噏:早晚洗地各半個鐘 在囚何俊仁大呻吃力

20210606
東網電視
更多新聞短片
何俊仁對於每日早晚要各洗地半個鐘,感到頗為吃力。
民主黨前主席何俊仁(AV仁)因前年10.1非法集結案,被判囚18個月。佢嘅前助理、屯門區議員朱順雅尋晚(5日)就更新AV仁調至新院所服刑情況,指對方尋日開始喺洗衣房返工,仲要一早一晚各洗地半個鐘,對佢而言頗感吃力喎。
朱順雅尋晚喺貼文中話,AV仁由荔枝角收押所調到新嘅院所服刑後,隨即要接受「迎新」訓練,尋日開始更要每日喺洗衣房返幾個鐘工,負責摺疊及燙衣服,當中一早一晚各洗地半個鐘,因為要用力擦地,所以令佢感到吃力,但其他工作仲算應付到,仲強調自己唔太辛苦。AV仁仲話由5月中還押至今,瘦咗4公斤啊。
其實AV仁都差唔多70歲,2017年更因為發現患初期肺癌,要做手術切走咗6分1個左肺,依家仲要做啲吃力嘅工作,的確係難頂啲。講真邊個叫佢一把年紀,仲要不自量力同班後生仔出去齊齊搞事,佢同壹傳媒黎智英被內地官媒炮轟為「叛國禍港四人幫」,佢真係同黎智英難兄難弟,睇怕依家齊齊喺獄中洗地、洗廁所喇!之但係,話晒體力勞動工作都係為咗幫在囚人士反思己過,希望依家嘅返工生活可以令AV仁洗「地」革面,反省過錯啦!