政Whats噏：救生員人手不足　議員批康文署闊佬懶理

炎炎夏日，最佳嘅消暑活動當然係去游水啦。之不過康文署救生員人手向來不足，而署方又遲遲都未解決，近年喺招聘救生員方面更遇到結構性困難，以致市民無法喺安全情況下進行水上活動，公眾泳池及泳灘設施亦屢次因人手不足而關閉。議員葛珮帆(EQ)今日(8日 )去信公務員及資助機構員工事務委員會，要求加入議程，討論救生員人手及職系架構檢討。

EQ提到，即使署方喺4月起重開大部分泳池及泳灘，但喺缺乏人手下，設施未有全面開放，市民喺酷暑盛夏，都冇得去泳灘放鬆下，即使部分泳灘開咗，亦冇足夠救生員，嚴重影響泳客安全。佢話救生員人手不足唔係第一日嘅事，現象已存在多年，但康文署一直懶理，根本無解決過問題。

佢建議要率先進行架構檢討，唔少救生員係季節性工作，完全無升職同發展空間，難以吸引人才入職，故當局必需要檢討架構；其次則係技能考核方面，加強考核以確保錄取具經驗救生員，保障市民安全。