政Whats噏：大埔區議會再現內訌　劉勇威陳振哲隔空爆罵戰

泛民主派區議員人數已經大減，點知佢哋之間仲連連發生內訌。大埔區議員陳振哲同劉勇威隔空對罵，一個批評對方繞過工作小組辦事，一個就反駁作為委員會主席唔需要請示工作小組先可以做事、斥對方惡人先告狀。最後陳振哲話只好識做咁辭去小組主席職位喇。

陳振哲作為跟進大埔商舖引致阻街/環境衞生問題工作小組主席，佢率先開炮去信環保、漁農、工商、食物及衞生委員會主席劉勇威，話佢經常喺未知會工作小組嘅情況下，直接處理有關事務。所以陳話根據基本政治倫理，只好識做咁辭去小組主席一職，畀人哋接手辦事喎。

劉勇威當然都唔執輸，喺社交網站駁斥近日係由食環署邀請佢視察跟進違規店舖嘅成效，同時已發電郵邀請其他議員去睇。不過「偉大嘅小組主席大人話被繞過咗」，佢直言「吓，乜原來依家委員會主席做事要請示屬會小組主席大人先做得？」，仲話對方惡人先告狀添。劉仲隔空同陳講「你個小組要上委員會匯報㗎，唔係你大晒的」，怒斥佢一直橫行霸道、氣燄囂張，真係好大嘅官威喎。