政Whats噏：畀議員質到暈　陳肇始失魂離場忘甩咪

政府日日「谷針」但成效不彰，食物及衞生局局長陳肇始今日(9日)喺立法會大會上，被議員質問政府有咩措施鼓勵市民打疫苗，又認為政府應盡快同內地或其他地方達成協議，打針縮減檢疫期先吸引到人打針嘛。唔知係咪畀議員質到頭暈暈，陳肇始離場時竟然唔記得除咪，條咪線仲連着枱面，非常狼狽啊。

陳肇始喺立法會回應議員質詢時心口上掛住一個咪，咪線連接枱面。陳離場時卻一時失魂，唔記得除咪，搞到陳戟一戟。佢要一手拎住文件，一邊用早前整親受傷嘅手除咪，大約用咗10秒。不過，慘在當時並無同事等埋佢走，或者走上前協助佢除咪。

陳肇始喺議會嘅尷尬事，當然唔止今日呢一單。今年2月財政司司長喺立法會發表新一份財政預算案時，陳捱咗1個鐘左右，就開始「瞌下醒下」。雖被傳媒捕捉到「釣魚」嘅醜態，但陳喺5月初出席醫院管理局研討大會時，亦都瞌眼瞓差唔多半個鐘，完全無視在場嘉賓嘅分享。

除咗不時烏眉瞌睡，陳嘅意外又特別多。上周五陳喺議會回應議員質詢時，被發現左臂同手腕位置紮咗繃帶，後來佢嘅新聞秘書解釋，陳係意外跣倒致左手受傷但無大礙，日常工作不受影響。睇番紀錄，陳都可謂「容易受傷的局長」，譬如佢2015年做食物及衞生局時，喺健身期間跌倒，右手虎口位舟骨骨裂；2019年3月不慎滑倒，右手輕微骨折觸及手腕舊患，需入院求診打石膏，仲因此缺席公開活動。

陳肇始經常遭受猛烈抨擊，但又成日犯上低級錯誤，譬如今年年初陳冇帶到證件，就打算進入被劃為受限區域嘅「疫區」視察，隨即畀在場嘅警員截停，要靠在場嘅民政事務局局長徐英偉幫手解釋，先至獲放行。陳身為掌管城中衞生嘅最高級官員，竟然可以反轉戴口罩出席防疫措施記者會，都不可謂不諷刺。陳雖然係護士出身，但瘀事一籮籮，可見佢並非謹小慎微之輩，睇見佢連自己都搞到一鑊粥，市民又點會有信心，交由佢去領導抗疫呢？難怪坊間不斷有聲音，要佢退位讓賢啦！