政Whats噏:畢東尼年前發現腎腫瘤 隔離期間決定放棄議席

2021年06月10日 10:15
東網電視
更多新聞短片
畢東尼完成手術,話住院期間覺得痛不欲生。
舊年12月九龍灣麗晶花園爆發疫情,時任當區區議員畢東尼就被鬧爆身處英國風流快活,拋低當區居民。事隔半年,佢終於解畫,原來佢喺1年前發現腎臟出現腫瘤,希望喺手術前到英國同家人會面,先至會滯留當地。而佢喺隔離期間領略到「斷捨離」,於是作出辭任區議員嘅決定。
兩個月前畢東尼宣布退出政壇,今日(10日)佢再解釋箇中原因。原來畢東尼喺1年前突然覺得心臟疼痛,醫生檢查後認為心臟並冇問題,不過就發現腎臟有個1厘米嘅腫瘤。佢原本安排今年2月進行手術,但考慮到所冒嘅風險,所以先到英國同屋企人會面,殊不知就此滯留英國。畢東尼話長達42日嘅酒店隔離中,明白到「斷捨離」嘅道理,對於某啲事情必需有所放棄。
原本安排好嘅手術結果延至上月先至進行,畢東尼話住院時有一晚覺得痛不欲生,曾渴求離開人世。佢話現時仍感到痛楚,希望下星期移除體內喉管後,可消除不適感覺。除咗疾病為佢帶嚟考驗,仲有精神上嘅痛苦,因為摯愛嘅親人唔喺身邊,令佢孤獨咁面對苦難。