政Whats噏:何君堯撤回司法改革議案 留番東方專欄益讀者

2021年06月11日 18:42
東網電視
更多新聞短片
何君堯話自己一向喺《東方日報》專欄討論司法改革,決定喺立法會提出另一項議案。(陳芷晴攝)
香港司法亂象一籮籮,議員何君堯原本打算提出司法改革嘅議員議案。不過何突然撤回議案,佢就解釋已經固定星期一至五喺《東方日報》(下稱「東方」)龍門陣寫專欄,討論司法改革,決定喺立法會討論其他議題。睇嚟有好嘢佢都係留番畀東方啊!其實喺銷量第一嘅東方寫專欄,淨係本港都有幾百萬讀者,未計海外華人,效力同立法會提議案不遑多讓啦。
何君堯原定喺下周三(16日)嘅立法會會議上提出「司法改革」議員議案,佢提到自前年黑暴風波以嚟,社會對司法機構嘅表現抱怨甚深,包括批評司法效率低、程序亦有被濫用之嫌,導致案件積壓如山。另外,對部分明顯嚴重罪行給予過分輕判,畀人黑箱作業嘅感覺。所以何促請盡快進行司法改革,佢建議設立量刑委員會、廢除法官戴假髮嘅傳統,去除司法機構殖民地嘅標誌等。
不過何君堯突然喺尋日(10日)撤回議案,引起傳媒追訪。佢多次提及東方,笑言因為喺東方寫開一系列有關司法改革嘅文章。有見及此,佢決定留番機會喺立法會提出佢另一項好關注嘅議題,就係爭取喺8月15日前通關喇,仲打算同議員協調畀佢率先提出議案添。