政Whats噏：被還押近10個月快必瘦15磅　家人唔信瘦咁少

人民力量成員譚得志(快必)，因分別被控發表煽動文字、喺公眾地方作出擾亂秩序的行為及參與民主派35+初選，涉違《港區國安法》等控罪，舊年9月被捕後一直被還押，不得保釋。快必被還押差唔多10個月，佢嘅家人今日(14日)探佢時就話佢瘦咗好多，原來快必輕咗成15磅啊！

快必喺社交平台話自己好耐都冇試過除晒衫照鏡，上星期一照覺得自己上半身瘦晒，笑稱係向戰俘身材邁進，先兩日磅重發現輕咗15磅，得返150磅。而佢嘅家人反而感到驚訝，因為覺得佢瘦咗咁多，竟然都只係輕咗15磅咋。快必就解釋話自己有保持做運動，肌肉紮實咗。佢屋企人就笑稱最重要係塊臉瘦咗，有返條頸。

雖然體形瘦咗，但快必皮膚狀況就麻麻地喇！佢之前生唇瘡，身體出紅色粒粒，頭頂又有頭瘡。佢話唇瘡就用天然療法等佢自己好返，至於其他嘅紅色粒粒，就搽咗醫生畀嘅藥膏，都覺得好有效。不過，佢話收押所翳焗，衞生環境又差，好返之後都會好快又再生返，之後再搽藥膏好返，不停重複呢個過程喎。