政Whats噏：議員轟研發中心制度落後　變相送走人才

本港屢被質疑係「創科沙漠」，但有議員認為並非欠缺創科人才，而係好嘅發展環境。立法會工商事務委員會今午(15日)開會，討論有關本港5個研發中心時，議員蔣麗芸(Ann)批評當局，研發成果商品化不力，發明者未能從中獲益，變相驅使人才移往其他地方！

Ann就話，世上唔少地方都會容許發明者佔有部分股份，以激勵佢哋喺研發、推廣以至商品化時更積極。創新及科技局常任秘書長蔡淑嫻回應時就話，研發中心屬公營機構，故並無有關安排，但話會計入考勤表現當中，對升職會有幫助喎。

之不過，Ann就重提本港當年引入智能身份證時，世界各地嘅研發人員都好積極推銷，事關佢哋能夠從中獲益；又指香港若然亦有相關做法，研發中心可以夥拍本地生產公司，自然會為本地經濟帶嚟進帳。Ann又鬧爆港府現有制度，令唔少創科人才轉投境外私人企業，生產唔喺香港、發明者離開香港，令到好多喺香港研發嘅新產品如無人機等，一個唔覺意就咁流失咗！