政Whats噏：傳政府改特權法准Zoom開立會　謝偉俊：未展開工作

立法會內務委員會今日(18日)召開會議，主席引述政務司司長張建宗會面時表示，喺立法會大會通過新一輪嘅議事規則修訂後，政府當局會盡快提交修訂《立法會(權力及特權)條例》嘅法案。有消息指，今次修改《特權法》有兩大要點，除修例配合立法會落實議員無故缺席致流會或被扣日薪3,400元外，亦都計劃賦權立法會以遙距視像方式召開所有會議，包括立法會大會，避免因疫情或其他緊急情況而無法如常開會。

立法會議事規則委員會主席謝偉俊，話下一步議事規則修訂可能會探討以遙距方式召開包括大會、內務委員會、財務委員會等會議。至於議員如何就法案及議案表決，有消息指可能研發人面辨識方式投票，謝就話只係聽聞委員建議，未有展開相關修訂工作。

展望將來，民主派議員阻礙會議進行嘅機率雖然唔高，但謝指仍需為突發情況做準備，確保有需要時仍可如常開會，儘管有關修訂可行，但未必喺今屆立法會任期內完成修訂工作。謝又透露正準備新一輪嘅議事規則修訂工作，但內容零碎，適時會再作公布。