政Whats噏：公民黨再爆退黨潮　陳琬琛余德寶等11名區議員退出

有消息指政府計劃喺下月安排現任區議員宣誓擁護《基本法》及效忠香港特區，參與去年民主派「35+」初選、借出議員辦事處作票站，及曾簽署「墨落無悔」聲明書等，最少3個行為料被列入「負面清單」，涉事區議員將被褫奪議席(DQ)。公民黨就有至少10名區議員宣布退黨，再加上離島區區議員容詠嫦已去上星期退黨，區議員人數由16人大減至5人。

今日傍晚約6點起，觀塘區議員王嘉盈、沙田區議員陸梓峂及麥梓健、身兼執行委員會成員嘅葵青區議員張鈞翹、深水埗區議員劉家衡及李俊晞、油尖旺區議會副主席余德寶、荃灣區議會主席陳琬琛及區議員陸靈中，同埋離島區李嘉豪喺Facebook(Fb)宣布已經退出公民黨，離島區另一名區議員容詠嫦就喺上星期已經宣布退黨。另外，公民黨九龍西支部主席温仲然因私人理由決定退出公民黨，並辭去黨內一切職務，即時生效。

陸梓峂發文宣布已向公民黨提出退黨申請，她指雖然加入該黨嘅時間唔長，但亦感謝該黨支援同照顧，相信聚首終有期，來日必定會再聚。張鈞翹就話大學一年級進入公民黨實習，至今已7年，中間曾離開又返嚟。他話現時政黨之路寸步難行，所以決定退黨，又稱已喺早前提出退黨通知，希望以後作為獨立民主派議員繼續行落去。劉家衡形容退黨決定沉痛且艱難，有關申請今正式生效。

喺2019年區議會選舉中，公民黨取得33個議席，成為民主派喺區議會中第二大政黨。不過，自上年有黨員被取消參選立法會議員資格後，公民黨已爆發退黨潮，至今年初民主派人士因參與初選被控「顛覆國家政權罪」，有關情況一直持續。而早前政圈盛傳，當時以政黨名義簽署「墨落無悔」聲明書嘅公民黨，喺宣誓後所有區議員料會「全數陣亡」。

該黨近半年逾10名區議員退黨，包括葵青區議員冼豪輝及譚家浚、南區區議員俞竣晞、東區區議員鄭達鴻及李予信、黃大仙區議員鄭文杰及劉珈汶、觀塘區議員畢東尼，以及沙田區議員黃文萱等。