政Whats噏：「老鴿」李永達當選副主席　透露黨內區議員憂被DQ

因參與去年民主派「35+」初選，涉違《港區國安法》現正還押嘅前議員、同屬民主黨嘅林卓廷、胡志偉同尹兆堅等3人先後辭去黨內副主席同埋中委職務。民主黨今午（20日）舉行特別會員大會，補選黨內副主席同埋兩名中央委員會成員空缺。黨內「老鴿」、曾任主席同副主席嘅李永達(高達)喺無競爭嘅情況下當選副主席。

至於中委會候選人梁國華及張茂清，亦都成功當選。對於再出嚟擔任副主席，高達早前強調原本無意再出任該黨嘅管理層，只係探望在囚黨友時，被林卓廷同前主席胡志偉及前副主席尹兆堅「力勸出山」。

高達當選後又話，知道現時擔任政黨領導層有一定風險，但相信自己有承擔黨內工作嘅責任，會堅持喺合法範圍內表達市民心聲。佢又指，過去幾日同30至40名黨員或區議員會面，了解到佢哋擔心被捕或遭撤銷區議員資格(DQ)，所以佢上任後首要工作係加強同黨員溝通，穩住「軍心」，呼籲佢哋唔好過分驚恐或者作出太激烈嘅反應喎。

查實高達本身亦有案底在身。2014年爆發違法佔領行動(佔中)，高達喺2019年被裁定煽惑他人作出公眾妨擾罪成，被判入獄8個月，緩刑2年。高達獲得輕判，當時曾惹起輿論熱議。