政Whats噏：獄中搬衫感虛脫　梁凱晴呻辛苦

前觀塘區議員梁凱晴因出席去年六四集會而被控參與未經批准集結，早前認罪並遭判處入獄4個月，梁亦因判囚失去區議員資格。其社交平台尋晚(20日)刋出梁寫嘅信，大呻依家喺洗衣房嘅工作非常辛苦，尤其係要搬運嘅衣物非常重，每日就好似虛脫咁，又透露入獄至今，體重已輕咗4公斤。

梁喺信中提及，6月7日被調去負責處理已清洗衣物嘅一號枱。佢話初時以為毋須再擦衣領，就可以擺脫擔心聞到腦部受損嘅清潔劑氣味，以及唔使再清倒惡心嘅垃圾，殊不知擺脫一層地獄，竟換來另一層地獄！因為依家佢要「秤」啲衫上籠車，而其他人就形容啲衫仲重過佢，結果「每日就好似虛脫咁，拖住個冇靈魂嘅殼返Dining Hall食飯再返倉。」

雖然體力消耗好大，但佢就話自己早前睇睇吓中途丟低嘅一本小說，依家喺獄中竟然畀佢一口氣讀完，都算感受甚深啦！