政Whats噏:朱古力仲使唔使入貨? 被還押張可森怕肥拒絕

20210622
東網電視
更多新聞短片
張可森已辭去屯門區議員職務。
屯門前區議員張可森因參與舊年民主派35+初選,涉違反《港區國安法》被控串謀顛覆國家政權罪,現還押喺赤柱監獄。有現任區議員日前曾經去探望佢,問起佢仲使唔使攞啲朱古力畀佢時,佢即刻拒絕,話怕食肥喎。
張喺2月底被還押,兩名現任屯門區議員朱順雅同曾振興日前去監獄探佢,朱喺社交網站貼文引述張同曾喺會面時交代咗一啲公事之後,就滔滔不絕咁講近況,雖然只有15分鐘時間,但都傾得好開懷。曾仲講笑咁問張仲要唔要幫佢入啲朱古力,張即刻話:「咪了!會吃肥!你哋幫吓手食啲啦⋯⋯唔該」,3人隨即相視而笑。
其實張係喺還押中辭去屯門區議員一職,5月11日生效,而佢嘅議員辦事處則早喺3月底結束,據悉係其一眾議員助理嘅安排。據了解,張嘅助理曾向民政事務處查詢,能否繼續報銷辦事處租金,但冇明確答覆,所以決定先關閉辦事處,以免日後唔能夠報銷。