政Whats噏：沙田區政宣布解散　前召集人早已辭去區議員職務

沙田區政今日(25日)突然喺社交平台專頁上宣布解散，前副召集人趙柱幫喺社交平台上話「時局兇險，難展抱負；前路艱苦，大家珍重。」事實上，組織從2017年12月14日成立，至今運作僅逾3年。

組織成立之初，只係得11名沙田區議員，當時組織嘅共識係希望凝聚區內民主派力量，以及同一班獨立嘅議員可以加強合作。其後喺2019年初新增兩位新成員，正式成為沙田區第一大政治組織。

2019年區議會選舉前後，該組織喺沙田區議會嘅議席新增至15個。之不過，要求區議員宣誓嘅《2021年公職（參選及任職）（雜項修訂）條例草案》刊憲及生效前一日，沙田區政前召集人、前沙田區議員丁仕元喺今年5月20日聲稱唔想屋企人活在惶恐之中，同埋對政治制度表示不滿，所以就宣布辭任喇。