政Whats噏：新同盟解散後派建黨百年禮物　關永業遭狠批火速變臉

新民主同盟日前宣布解散，話希望可以保平安喎。前新民主同盟成員、大埔區議會主席關永業今(27日)喺Facebook貼文，上載喺街站派發小禮物嘅相片，仲話「慶祝建黨百周年，派發小禮物，派完即止」。點知貼文一出，就畀網民質疑佢火速「變臉」，直言「變幻還比魔術快」。

喺今日嘅街站，關嘅前黨友、同區區議員任啟邦都在場，佢哋向街坊派發原子筆作為小禮物。本網向關查詢時，問到貼文內容係咪有特別意思時，關就話依家個主旋律係咁，反問唔通要講相反嘅嘢咩，直言一陣要勞動國安法就無謂，仲話相信喺呢個普天同慶嘅日子派禮物應該冇問題。至於會唔會擔心民主派支持者反感呢，關就話呢個就「各自玩味」啦。

之不過，有網民見到關嘅貼文，就反應好大，即刻指摘對方，話佢係「鬼上身」。睇嚟今次真係難分真與假喇！