政Whats噏:稱家庭最重要 畢東尼離港與家人團聚

2021年07月05日 13:01
東網電視
更多新聞短片
畢東尼喺Fb貼文,指已離開香港與家人團聚。
自傳出政府要求區議員宣誓,到宣誓條例5月刊憲後,已引發多次區議員離職潮。其中喺舊年九龍灣麗晶花園爆疫期間,時任區議員畢東尼因身處英國未能返港協助居民而畀人鬧爆,及後更因健康理由辭職及宣布退出香港政壇。佢尋日(5日)就分別喺Facebook貼文同WhatsApp中發短訊,話佢「正在歸途,與家人團聚」,又指斷捨離、家庭係人生中最重要嘅一環,並附上喺香港機場離境大堂揮手道別嘅相片。
其實畢東尼早前就被指喺英國「風流快活」一事解畫,佢話喺一年前發現腎臟出現腫瘤,希望喺手術前前往英國同家人會面,點知滯留當地。當時原定喺1月1日返港,並喺2月入院做手術,但因為滯留英國一段時間,手術延遲至5月中先進行。
佢仲話由英國返港後,感到身體大不如前,體力或精神上都比以往遜色唔少,喺處理地區事務上都感到吃力,認為自己身體情況已經唔能夠再應付區議員日常工作。佢又話喺長達42日嘅酒店隔離中,明白到「斷捨離」嘅道理,對於某啲事情必需有所放棄,所以決定辭任區議員同退出香港政壇喎。