政Whats噏:起底歪風猖獗 議員指修例無礙言論自由

20210717
東網電視
更多新聞短片
自2019年年中起,本港歷經反對修訂《逃犯條例》社會事件,期間出現不少「起底」行為,甚至當中有針對執法人員及其家屬等情況,政府計劃修訂《個人資料私隱條例》將起底列為刑事罪行,草案將於下周三(21日)提交立法會首讀。不過旨在打擊起底行為嘅條例修訂,就惹來坊間嘅憂慮聲音,擔心言論自由受到影響,早前更傳出多間互聯網企業撤離香港嘅消息。議員陳健波(波哥)就認為毋須過慮,指將他人嘅個人資料公諸於世,其目的係迫使人家噤聲,所以起底行為先至係威脅言論自由。
波哥早前透過社交平台痛斥起底行為猖獗,並造成社會上一股歪風。佢話公開他人嘅姓名、住址、電話、身份證以至家人、小朋友嘅資料,會令受害人蒙受巨大心理及財務損失風險,更有人身安全威脅,而且資料一旦上網,根本無法完全移除,影響可以係終身。況且喺起底嘅陰影籠罩下,若果唔想自己同家人嘅私隱被公諸於世,以致出現大人被盜用身份證借錢、小朋友被欺凌嘅可怕後果,結果就惟有選擇噤聲,因此起底絕對係一種反言論自由嘅行為、係可恥嘅恐嚇。就算個人私隱專員公署跟進投訴,但礙於現時法例所限,能夠做嘅選項唔多,雖則會聯絡相關嘅平台或討論區,但當中有3成內容未能移除。
至於早前有報道指,多間互聯網企業憂慮修例影響而考慮撤出香港市場,不過後來就澄清話只係致函港府表達業界關注。波哥就話有關修訂因處於草擬階段,相關企業未了解條例嘅涵蓋範圍,擔心要負上刑責其實係可以理解,但佢認為港府只要清晰列明起底行為及意圖,同埋參考外國準則,相信有關企業了解之後,應該唔會撤出香港。
此外,個人資料私隱專員鍾麗玲今早(17日)出席電台節目時,同樣指出起底行為近年屢屢發生,部分案件更涉及幾歲小朋友,已觸犯道德同法律底線。鍾強調立法打擊起底行為,喺國際間並非新鮮事,新加坡、澳洲、新西蘭等早已立法,而根據私隱公署委託香港大學進行嘅調查,結果顯示有約三分之二受訪者都支持加大私隱公署權力以遏止起底。鍾相信政府喺制訂草案時,已平衡保障個人私隱同言論自由。