政Whats噏：曾與楊岳橋譜「戀曲」　久未露面陳玉娥現身天水圍

立法會新界東選區前參選人陳玉娥(娥姐)因一張合照，曾經同立法會前議員楊岳橋(AY)譜出「娥頸橋之戀」，當年引起社會熱議。近年佢甚少公開現身，不過喺尋晚(18日)天水圍某屋苑嘅一場業主委員會選舉中，就見到娥姐驚喜現身，到場支持參選人喎。

話說娥姐尋晚戴眼鏡、身穿桃紅色上衣現身會場，即使戴上口罩都好易被認出。究竟點解佢今次會殺入天水圍呢？原來佢都係住喺天水圍，今次更係佢所住嘅屋苑舉行業主委員會改選。

講起娥姐應該冇人會陌生，佢之所以成為網絡紅人，全因喺2016年立法會選舉，佢同AY同為新界東地方選區嘅競爭對手，喺公布點票結果後兩人同台合照，引起全場哄動。隨後網上竟然流出一張兩人額頭互貼嘅親密合照，最後發現原來係有網民「改圖」，外界因而稱兩人關係為「娥頸橋之戀」。