政Whats噏：入境修訂條例下月生效　陳克勤支持掃走假難民

假難民濫用免遣返聲請嘅問題纏擾本港多年，如今終於迎嚟曙光，皆因為咗打擊假難民嘅《2021年入境（修訂）條例》將於下月1日起生效。作為立法會保安事務委員會主席嘅議員陳克勤批評假難民為咗喺香港從事違法工作，濫用本港資源以至香港人嘅同情心，期望今次修例可以令假難民絕迹！

陳克勤提到現時有差唔多99%正等候酷刑聲請嘅申請人，最終都被判定係假難民。佢哋旨在等候期間可以喺香港打黑工賺錢，就會扮唔識英文，令到政府要專程去山旮旯咁遠嘅地方，搵一個可以同申請人用家鄉話溝通嘅人，幫佢落口供等。但係今次修例列明如果入境處合理地認為聲請人有能力，可以直接指示聲請人以該語言溝通，就例如係英文。

假難民仲有其他拖延程序手法，例如會宣稱被虐待而要求睇醫生，不過睇完醫生又玩失蹤、聲稱唔得閒提交醫療報告等。陳克勤認為修例中縮短提交文件嘅限時，都有助應對假難民嘅拖字訣。佢期望條例實施後，可以早啲掃走假難民、唔畀佢哋爭飯碗，咁香港人就有安樂茶飯食喇！