政Whats噏:袁嘉蔚刑滿轉還押 因有更多零食感開心

2021年07月21日 13:30
東網電視
更多新聞短片
袁嘉蔚轉為還押身分,為可得到更多零食感開心。
南區前區議員袁嘉蔚同埋觀塘區前區議員梁凱晴因去年出席六四集會,而被控參與未經批准集結罪,儘管同案共有廿多人被控,但袁同梁兩人嘅刑期相對較短,並喺尋日(20日)結束4個月嘅刑期。不過袁嘉蔚因有另一官司在身,仲未可以出獄,只係轉為還押身份,不過都已經夠開心喎。
袁嘉蔚嘅社交網站有更新,提到佢喺尋日完成刑期,轉為還押身份,繼續就參加去年民主派「35+」初選,涉違反《港區國安法》一案喺羅湖懲教所羈押。有親友見袁嘉蔚獲得較佳鐵窗待遇嘅第一日,已經即時去探望,引述袁話雖然唔可以出獄同大家相見,但可以有更多嘅探訪機會同埋更多嘅零食,都覺得好開心喎。
六四案嘅被告仲包括前香港眾志秘書長黃之鋒同荃灣前區議員岑敖暉,分別被判監10個月以及6個月。若果岑獄中行為良好的話,預料服刑至下月尾可告完結,而岑嘅社交平台專頁前幾日亦有分享佢嘅近況,提到仲有幾個星期就轉返還押身份,好期待到時可以見多啲親友喎。