政Whats噏：議員批部門各自為政　長者友善政策不了了之

香港人口急劇老化，連帶勞動力亦有下降趨勢，政府能否對長者提供足夠醫療服務不令人憂慮，政府有冇諗過改善環境以切合長者所需，亦甚受公眾關注。有唔少議員鬧爆政府部門各自為政兼且互相卸責，搞到長者友善政策唔見影。

立法會今日(21日)通過「推動公共健康政策，享受優質老年生活」嘅議員議案，提出動議嘅議員陳健波話香港人平均壽命長，但若然「周身病痛」係一種折磨、生不如死。佢亦留意到本港嘅公共衞生政策不足，往往喺流感高峰期都有「逼爆」公營醫院，醫護人員疲於奔命嘅現象。佢認為市民已習慣防疫，係推動政策嘅最佳時機，促請政府提供更多運動設施、創造健康生活嘅環境等。

建築界議員謝偉銓關注舊區人多車多、路窄樓密，路邊亦有大量垃圾桶、電箱等，對長者並唔友善。佢話當有重建項目建議拆走部分欄柵等，往往要經多個政府部門審批，亦有互相推卸之嫌，佢早年曾倡議修改規劃標準以興建長者適切居所，但因為政府部門牽頭同協調，因而不了了之。

點樣吸引長者做運動？金融界議員陳振英建議政府可以同電子支付商合作，例如長者一日步行8,000步就可以換取20元獎勵，又話建立良好飲食習慣能避免患上都市病，建議政府讓公營廣播機構製作多啲長者健康飲食節目。

有工會背景嘅議員郭偉强就話健康應由年輕做起，但香港工時極長，令到好多健康活動都做唔到，質疑勞工及福利局係咪有意就標準工時立法，還是「淨係睇錢」？醫學界議員陳沛然亦話香港工時同學生學習時數極長，令90%嘅中小學生未能達到世界衞生組織建議嘅運動時數。佢仲話喺立法限制最高工時，商界一定會反對，政府亦唔介入，坦言若政府唔認真檢討有關問題，即使興建幾多個運動場都唔會有用。

雖則班議員提咗咁多意見，但食物及衞生局局長陳肇始回應時都係舊調重彈，話本港人口老化係不爭嘅事實，又話政府會制訂全面同長遠規劃，包括推行十年醫院發展計劃、喺18區興建地區康健中心等支援長者需要。