政Whats噏：梁凱晴出獄冇得抖　趕落區拆報告板

觀塘前區議員梁凱晴由於出席去年六四集會，而被控參與未經批准集結罪，被判入獄4個月。佢喺前日(20日)出獄，不過睇嚟都冇得休息住，皆因佢當日已經即刻收到通知要拆除社區嘅報告板啊。

梁凱晴喺社交網站分享，相信各位街坊已經發現，原本喺一所小學隔籬嘅社區報告板唔見咗。由於梁被判刑，失去區議員資格，前日「放學」後已經即刻收到通知要移除報告板，尋日就趕到原屬月華選區，同義工一齊親身卸下剩餘嘅3塊社區報告板，話係有始有終。佢又提到，等佢再休息多陣，整理一下思緒後，會再同大家分享更多。

梁凱晴入獄前有一頭女性化嘅及肩髮型，不過喺獄中已經剪成清爽短髮，身形亦較以往瘦削。唔知佢今次久違落區，一班街坊仲認唔認得佢呢？