政Whats噏:傳與執法人員離開後冇返工 西九首席工程總監今離任

2021年07月22日 17:18
東網電視
更多新聞短片
西九管理局一向被視為燙手山芋。
西九文化區管理局再有人事變動!西九管理局今(22日)宣布首席工程總監司徒澤民(Jeremy Stowe)即日起離任。其實早喺5月嘅時候,已經有傳司徒澤民同執法人員離開辦公室後,就冇再返工,及後確認佢以私人原因休假。
西九管理局話將進行公開招聘,物色首席工程總監繼任人選。署理首席工程總監向玉璽將繼續帶領工程團隊直至繼任人選履新。根據資料,司徒澤民喺2012年加入西九文化區管理局,擔任建築項目管理主管,2016年獲委任為項目監管總監,至2019年1月晉升為首席工程總監,掌管西九文化區所有項目的設計、工程及項目管理。
其實,西九管理局財政狀況及行政管理情況一直不堪入目,政府早喺2008向立法會申請撥款216億港元推展西九,但因工程延誤多年,令超支嚴重,預料未來3年折舊前營運赤字達39億港元,被外界狠轟係無底深潭。而西九管理亦長期混亂,連續3任行政總裁由外籍人士擔任,但任期未滿就請辭,前行政總裁栢志高亦提早喺去年11月底離任。