政Whats噏:郭榮鏗任哈佛學人 評論員批除反中亂港外對港零貢獻

2021年07月22日 18:00
東網電視
更多新聞短片
郭榮鏗被轟過去除反中亂港外,對法律界以至香港並無特別貢獻。
前公民黨創黨成員、前議員郭榮鏗去年底宣布退出政壇後,旋即遠走加拿大並計劃申請重新入籍,最近更喺加國南面嘅美利堅有新搞作!哈佛大學甘迺迪學院(Harvard Kennedy School)網頁上,近日將郭列為2021至22年度亞洲學人(Asia Fellow),簡介中更形容郭過去所屬嘅公民黨捍衞香港法治、民主同人權。有時事評論員批評,郭過去除反中亂港以外,對法律界以至香港並無特別貢獻,形容哈佛作為國際知名學府,竟然自貶身價!
今年4月已退出公民黨嘅郭榮鏗,近日亦喺專業社交平台LinkedIn更新個人資料,透露自己由本月起喺哈佛大學擔任資深學人(Senior Fellow)。而哈佛就喺網頁簡介中同時提到,郭榮鏗擔任議員期間,曾就本港民主運動積極參與國際倡導工作,更曾頻繁前往美國同歐洲,游說當地官員同政客關注香港民主發展,同時係2019年反對修訂《逃犯條例》時嘅主要反對者。
時事評論員陳雲生認為,郭榮鏗擔任「哈佛學人」一事屬政治鬧劇,形容西方勢力要搞亂香港時,自然會抬舉一啲人物或角色。之不過,陳質疑郭過去喺本港法律界或議會,並無作出過任何重大貢獻,笑言哈佛將郭列為學人係自貶身價,罔顧其國際學術形象。佢仲形容,哈佛今次舉動變相係為反中亂港人士吶喊助威,事件正好赤裸裸反映美國等西方勢力亂港之心不死,更同時不打自招,證實有外部勢力介入反修例等事件。
據報郭榮鏗正申請重新取得其出生地加拿大嘅國籍,陳批評事件正好反映郭只係標準政客,當過去擔任議員有政治要求時就放棄國籍,如今重返加拿大後又希望取回國籍,認為事件足見其人格之低劣。