政Whats噏：陳肇始上月被發現手紮繃帶　自爆辦公室廁所跣親

食物及衞生局局長陳肇始自加入問責班子，起碼受傷3次。佢上月喺立法會議員質詢環節上被發現左手紮上繃帶，到今日（25日）出席活動時都未拆走喎，原來佢早排喺辦公室嘅廁所跣親，所以整親左手，被問到做乜多災多難時，佢都不禁嘆氣「唉」咗聲。

陳肇始上月被影到左手受傷，當時佢嘅新聞秘書就冇交代喺咩情況下受傷，只係話冇影響工作。陳今日就親自解畫，話因為辦公室廁所嘅地下濕滑，所以一唔小心就跣親跌倒，但好彩傷勢唔算嚴重，冇骨折。

不過，佢似乎一直都咁黑仔，前年3月出席一個公開活動嘅途中，唔小心喺公眾地方升降機入面跣親，有輕微骨裂，並觸及手腕舊患，需要送院治療，打完石膏就返屋企休息。另一次就喺2015年10月，當時任食衞局副局長嘅佢喺健身時失平衡跌倒，令右手虎口位舟骨骨裂，要用護腕固定右手，仲要接受為期6周嘅治療。