政Whats噏：議辦未能提早退租　前區議員丘文俊要諗計轉型

政府要求區議員宣誓，有消息指230名區議員因參與及支援初選、簽署民主派初選「墨落無悔」聲明或在辦事處展示反修例口號，將會被取消議員資格(DQ)並被追回薪津。曾協辦初選票站嘅前沙田區議員尋日(26日)喺社交平台上貼文，話房協拒絕處理其乙明邨明耀樓辦事處嘅退租事宜，搞到佢要繼續交租，批評房協冷漠、欠缺人性化喎。

丘話已於6月向房協表明，喺8月1日前辦理退租。其後佢於本月8日辭任區議員，亦有再去信房協陳情，希望盡早退租以減少財政負擔。後來佢嘅退租申請被房協拒絕，指除非有下一手承租該舖位，否則仍需繼續交租。至於丘喺水泉澳邨月泉樓嘅辦事處，則獲房屋署接納退租並已於本月9日辦妥手續。丘話對比房屋署嘅靈活處理，房協顯得冷漠同欠缺人性化，仲批評房協一直宣傳標榜自己有人情味，覺得非常諷刺咁話喎。

丘今日(27日)再透過社交平台，指租約列明舖位係議員辦事處之用，但佢已經唔係議員，質疑合約係咪已失效？佢又話租約直到2023年12月31日，依家會積極考慮繼續經營該舖位，叫街坊諗下有咩活動搞。

房協回覆東網指，房協轄下商舖無指定用作議員辦事處嘅舖位，所有用作議員辦事處嘅商舖租務安排同一般商舖無異，指丘於乙明邨所租嘅商舖，並無提早終止租約嘅條款，租約期至2022年第一季期滿。房協話如果租戶希望提早終止租約，可向房協提出申請，房協會盡快為相關商舖招租，當有新租戶承租，房協會安排原租戶退租，而若租戶有意更改商舖用途亦可向房協提出申請。

房協話今年6月下旬收到丘申請提早結束租約後，已安排為該商舖招租，上星期啱啱截止申請，現正進行審核，又話會繼續就租務事宜同丘保持溝通。