政Whats噏:林琳倡設立青年及體育政策局 培育更多人才

20210727
東網電視
更多新聞短片
林琳建議本港設立支援青年以及體育發展嘅政策局。(陳嘉順攝)
政府架構屢被批臃腫、疊床架屋,政界人士多年嚟都倡議將多個政策局拆局。適逢本港喜迎回歸以嚟首面奧運金牌,同時掀起大家關注政府喺體育發展上嘅支援,希望可以培育更多體育人才,唔使再等多25年先奪得下一面奧運金牌。青年發展委員會委員林琳就認為負責管轄體育發展嘅民政事務局工作量太大,連街邊垃圾都入佢數。林建議仿照外國,設立一個專門嘅青年及體育發展政策局啊。
雖則街上清潔事務應該由食物環境衞生署負責,但係林琳提到民政局有時都要落水、牽頭管埋清潔問題,仲有街邊樹木等,實在管太多嘢,以致支援體育方面唔夠專門。林琳提到好多外國政府都專門設立青年及運動政策局,因為有見運動員大多都係約莫30歲嘅年輕人,成立有關政策局就可以一石二鳥,專注負責青年運動事務喇。另外,香港政府近年積極推動創科發展,林琳認為創科亦包含運動支援,例如可以參照外國,引入更多幫助分析肌肉組織、選手狀態等嘅科技。
奧運熱潮仲勾起林琳學生時代嘅回憶,原來佢都係運動好手,喺香港就讀中學嗰陣參加過游泳、排球同乒乓波校隊。不過去到澳洲留學時,見到外國人唔止游水唔需要泳鏡,直接跳落水,仲要連個身都長過佢就放棄咗喇!
事實上,上屆政府早已提出架構重組建議,包括喺民政事務局中分拆出文化局。不過由於泛民主派喺立法會拉布被迫擱置計劃,轉眼間已經過咗大約10年,計劃已經不了了之,而本屆政府仲表明無意成立文化局添。至於體育支援方面,港府亦早喺2012年提出開設體育專員一職,不過政府官員之後提出體育專員並非問責官員層次,要再研究職位嘅級別定位。擾攘大約1年半,時任官員竟然話經過研究後初步認為設立職位並唔可行,因為要物色嚟自體育界人士統領各方持份者並唔容易喎。當大家認為計劃胎死腹中,政府到2016年又突然落實設立體育專員一職,可謂反覆無常啊。