政Whats噏：伍家朗球衣風波蔓延　網民質疑新球衣唔合格

港隊羽毛球「一哥」伍家朗早前飽受球衣風波困擾，被民建聯成員穆家駿強烈譴責佢穿着冇印上區旗嘅黑色球衣出賽。雖則喺面對巨大嘅輿論壓力後，穆終於道歉承認言論過重，不過點會咁容易平息事件啊。伍家朗換上贊助商提供印有區旗嘅球衣後，網民發現區旗「錯版」。同時質疑球衣實質上係網球衫，並唔適合打羽毛球，影響伍嘅表現導致佢落敗啊。

伍家朗尋日(28日)出戰男單小組第2場比賽，並換上胸前有區旗標識嘅綠白色球衣。不過緊貼賽事嘅一眾網民留意到球衣並唔吸汗，球衣濕透後「癡住」伍嘅上身。亦有眼利嘅網民發現，新戰衣上嘅區旗紫荊花瓣有勾、中間部分較為寬闊。但正確嘅區旗紫荊花瓣較窄，末端亦無勾。有市民懷疑贊助商不慎選用1990年嘅區旗原始設計，而非正式納入《區旗及區徽條例》嘅版本。

雖然有人質疑球衣上嘅區旗標識是否正確，不過挑起呢場風波嘅穆家駿，尋日就話高興看到香港羽毛球隊「袍甲鮮明」，穿着有香港特區標誌嘅運動服出賽。又指自己當日「一時情切」發表評論，「語氣有點過重」對此表示歉意。而穆所屬嘅政黨，其黨主席今日(29日)出席電台節目亦有幫佢解畫，提到黨內已經對穆家駿作出批評，對方亦已表達歉意，獲得政黨接受。至於穆家駿係咪應該直接向伍家朗道歉，就要交由佢自行決定喎。其實該黨議員何俊賢同埋張國鈞之前都有質疑球衣，政黨主席就否認事件反映黨內做事粗疏，未搞清事實就表態，反指運動員喺場上穿着有關運動服容易引起誤會。

當全城力撐伍家朗之時，離島區議員王進洋尋日喺社交平台提議為佢眾籌，仲話有信心筆錢夠佢買樓。然而貼文一出伍就輸波出局，大批網民質疑王出嚟抽水，又鬧爆佢嘅言論喺伍嘅傷口上灑鹽，提到運動員嘅夢想落空，唔係用錢或者一層樓可以彌補，叫王出少句聲當幫忙。

見到網民一窩蜂咁鬧佢，王嘗試解畫，話眾籌可以體現市民對伍家朗嘅支持，而香港體育發展一向缺乏資源，可以由伍自己決定點用筆錢喎。不過當然拆彈失敗，王進洋之後發表道歉聲明，話自己喺手誤嘅情況下，令大家誤以為眾籌計劃係用一層樓，代替為香港爭光嘅榮耀。佢又承認不論出發點如何，都應該考慮言論會唔會同香港人嘅距離遠咗，或者係好心做壞事嘅天真諗法喎。