政Whats噏：區議員辭職後要謀生計　網民介紹陳梓維送外賣

區議員宣誓「加辣方案」傳出後，觸發超過200名泛民主派區議員遞辭職信。儘管辭職潮已告一段落，但亦隨即面對有關溫飽嘅問題，有前區議員喺社交網站公開搵工，網民又有咩好介紹先？

油尖旺前區議員陳梓維自上任以嚟已經備受關注，當時已經有好多街坊唔客氣，勸佢盡早退位讓賢。佢辭職之後都為生計而苦惱，喺社交網站話「求工作介紹，咩方法都試」。有網民介紹佢去快餐店求職、送外賣等。亦有網民認為搵工應該上求職平台，直接分享平台網站畀佢。

夾都冇咁啱，另一位油尖旺前區議員賀卓軒都喺社交網站話「冇錢，我要努力搵工了，有冇介紹？」。由於賀有社工資格，大多數留言都叫佢做返本行。有人就問當區前區議員林兆彬係咪請人，林就話暫時未有能力喎。