政Whats噏：鄧炳強現身立會大樓　議員乘機反映訴求

立法會依家放緊暑假，但保安局局長鄧炳強都好勤力，趁有時間去巡視立法會大樓不同樓層，期間仲巧遇議員劉國勳添。劉就喺社交平台話「局長突擊檢查工作」，附上兩人嘅合照，仲話難得捉到局長，就同佢探討新界東北發展喇。

尋日(3日)劉國勳咁啱喺大樓撞到鄧炳強，就當然唔會放過機會啦。佢話平日都有官員嚟立法會大樓內搵人傾偈嘅，但局長親自到不同樓層就比較罕見。劉估計係保安局嘅職員帶鄧熟悉吓大樓，同埋介紹每位議員辦公室嘅位置咁喇。

新界東北發展新市鎮中，包括口岸重組、開放禁區等議題都涉及保安局範疇，劉就話局長都有畀吓意見，感覺上持開放態度，同議員有商有量。而劉下星期都會舉辦相關議題嘅記者會，話多得局長畀吓意見，等佢完善建議書之餘，仲可以預先同局方「打個底」添！