政Whats噏：黨友再幫穆家駿解畫　指事件已經告一段落

港隊羽毛球隊已經完成東京奧運賽事，並且返回香港。不過，民建聯成員穆家駿涉及嘅「球衣風波」似乎未告一段落。穆至今都未曾面對公眾，令到黨友頻頻要喺公開場合為佢解畫，今次就輪到該黨議員鄭泳舜(Vincent)被拖落水喇。

穆家駿早前批評港隊羽毛球「一哥」伍家朗穿着欠區旗標識嘅球衣出戰賽事，反被市民聲討。Vincent今日(7日)出席記者會討論本港嘅體育政策，在場傳媒十分關注穆家駿嘅言論影響港隊球員嘅表現，向佢追問黨內日後會唔會制訂指引，約束黨員行為以避免類似事件再次發生。

Vincent回應時重申政黨好支持香港運動員，至於有關穆家駿早前嘅言論，相信當事人已經清楚解釋，重申事件已經告一段落，而Vincent亦希望大家可以向前走、向前發展喎。