政Whats噏：何俊仁入獄近3個月　輕20磅仍失眠

民主黨前主席何俊仁(AV仁)因前年10.1非法集結案，被判囚18個月。佢嘅前助理、前屯門區議員朱順雅尋日(7日)喺Facebook貼文，指相隔兩個月後，再次探望AV仁，話AV仁嘅面龐明顯瘦削咗好多。

朱順雅喺貼文中表示，AV睇落瘦削咗好多，而喺AV仁最近畀佢嘅信件都提到減咗20磅。朱話AV仁皮膚睇落細緻，精神都幾好嘅，雖然覺得生活單調，但都算適應咗，但就仍然有失眠問題。

AV仁自從5月19日被判刑之後，輾轉到過兩所監獄，暫時唔使再搬嚟搬去。朱又話因為唔想佔用家屬嘅探訪配額，所以就盡量喺AV仁出庭嘅日子去法院旁聽，不過都比唔上近距離談話，所以都多謝AV仁家人安排探訪機會畀佢，不過，下次見面應該只能喺8及9月嘅法庭上喇！

其實AV仁6月頭由荔枝角收押所調到新嘅院所服刑後，就接受過「迎新」訓練，即係每日要喺洗衣房返幾個鐘工，負責摺疊及燙衣服，當中一早一晚各洗地半個鐘，因為要用力擦地，所以令佢感到吃力。當時AV仁就話過還押首半個月，已經瘦咗4公斤喎。