政Whats噏：李華明千金賣樓　賺過千萬　

最近民主黨(白鴿黨)是非多多，屢傳內訌。不過似乎有人歡喜有人愁，皆因民主黨創黨成員李華明嘅千金出售將軍澳1個實用面積約1,138方呎嘅4房單位，帳面獲利超過1,100萬港元啊。

根據市場消息，將軍澳天晉IIIA第5B座頂層特色戶、連約100方呎平台，曾經喺去年叫價3,400萬港元，啱啱減至2,960萬港元售出，呎價大約26,000港元。原業主持貨大約7年，帳面獲利超過1,100萬港元，消息指原業主就係李華明嘅女兒李敏蓓。

李華明亦都證實消息，話係希望「樓換樓」，現時一家3口一齊搬到西貢居住，希望享受一個更好嘅環境咁話喎。翻查資料，李華明去年中以3,800萬港元買入西貢新盤133 PORTOFINO 3座嘅頂層特色戶連2個車位，實用面積1,238方呎，附設天台919方呎。