政Whats噏：葉劉淑儀生日　黨友校友齊祝壽

行政會議成員、議員葉劉淑儀將於下星期二迎來佢嘅71歲大壽。雖然未到正日，但一眾好友就已經同佢提前慶生，今日(21日)葉劉透過社交平台上載多張合照，當中可見出席生日派對嘅嘉賓除黨友外，仲有現任保安局局長鄧炳強，同埋保安局常任秘書長葉文娟，而咁啱葉劉又係保安局前局長喎！咁都未止呀，葉劉同鄧炳強及葉文娟，亦都係中學嘅校友，三人嘅關係睇嚟都幾密切喎。

鄧炳強同葉文娟都準備咗一個粉紅色生日蛋糕，至於生日願望，葉劉就話希望香港能克服目前困境。佢又借今屆東京奧運香港運動員勇奪多面獎牌嘅表現，話佢哋展現咗不屈不撓、迎難而上嘅香港精神，認為香港人憑着呢種拚搏精神，必定可以走出陰霾，迎接光明嘅未來。