政Whats噏：女兒送電腦賀葉劉生日　換走10幾年舊貨

行政會議成員、議員葉劉淑儀尋日（24日）71歲生日，繼早前買生日餅與一眾行會成員分享後，今日（25日）就喺立法會再請食餅，仲提到話生日願望係香港能克服疫情，自己身體健康。

葉劉仲透露已向行會秘書建議，不如借鑒幼稚園每月舉辦一次生日會嘅做法，所有當月生日嘅壽星開完會，大家一齊唱首歌食塊餅，感覺歡樂啲。又話好似立法會咁，都成日搞生日會，食下蛋糕開心下，議員群組又會互相祝福，關係應該會融洽啲。

至於生日願望係咩？佢就話希望香港盡快克服疫情，可以通關，自己就最緊要身體健康。而早前由英國返港嘅囡囡都有同佢慶祝生日，仲送佢新電腦，終於有得汰換用咗10幾年嘅電腦咁話。