政Whats噏：練跑3個月戰渣馬　鄭泳舜聶德權掂唔掂？

上年因為疫情停辦嘅渣打馬拉松會喺今年10月24日舉行，議員鄭泳舜(Vincent)早前已經報咗名跑半馬賽事，練咗跑3個月左右。Vincent今日(29日)就約埋公務員事務局局長聶德權一齊練跑喎，得咁短時間備戰，佢哋兩個跑唔跑得掂㗎？

Vincent話今日約咗聶德權一齊去沙田城門河畔練跑，一齊跑咗10公里左右，佢話聶自己仲跑多啲啊，總共跑咗10幾公里。Vincent就話唔知聶報咗名參加渣馬未，因為始終聶工作都繁忙嘅，不過兩人都曾經多次相約練跑，Vincent指聶一向熱愛運動，兩人有時見面都會大談運動經喎。

其實Vincent已經報咗名10月24日參賽，最後能否出賽就有待公布，但佢都話好期待嘅。佢話雖然上年曾經參加過一個半馬長度嘅虛擬跑，但都係比較希望能夠同其他選手一同比賽。而現時疫情都開始穩定，佢都希望可以多番啲運動比賽畀市民參與啊！