政Whats噏：葉劉爆女兒冇得用消費券　咁蝕底？

政府喺月初派發首期2,000蚊嘅消費券，過咗差唔多成個月，相信唔少市民都已經使得七七八八，但議員葉劉淑儀都係近日至開始使用消費券，佢個女就仲慘，想使都冇得使。

點解冇得使？原來葉劉個女唔記得登記，所以冇得享用消費券喎。究竟點解唔記得登記，佢就冇多講嘞！正所謂蘇州過後冇艇搭，追唔番喇！之但係，坊間都有人提過，希望政府畀冇登記嘅市民補飛，唔知政府點諗呢？

咁佢又因乜咁遲先至用消費券呢？佢解釋，係因為公務繁忙喎，而佢喺上個周末就去咗「巡舖」嘞，仲有店員向佢「投訴」添！話政府喺發放第一輪消費券後，幾間大型超市嘅貨品已靜雞雞加價，而佢嘅司機亦話坊間唔少茶餐廳都加咗價嘞！

巡舖收咗咁多料，佢嘅結論係政府派5,000蚊消費券帶動本地消費嘅效應，遠遠大於政府經銀行派發1萬港元現金，而唔少市民收到消費券之後，好快就花光，所以佢認為政府分期發放消費券做法正確，否則總額300幾億嘅金額就好似燒煙花咁轉眼花光，只能產生極短暫嘅消費效應。