政Whats噏：獄中再憶被捕入「臭格」過程　黎雯齡：最難捱日子

香港言語治療師總工會5名成員，包括主席黎雯齡及外務副主席楊逸意，日前更被警方國安處拘捕，被控透過《羊村》系列3本兒童繪本煽動仇恨。職工盟日前上傳黎嘅獄中信，佢話由於還押時頭幾日所寫嘅信可能已寄失，所以重新寫信憶述當時被捕到入「臭格」嘅過程，直言係20幾歲人生中最難捱嘅日子。

黎喺信中提及好多人生第一次，包括朝早6點被拍門嘈醒，依家諗返都猶有餘悸，至被捕時被五花大綁落孖葉，發現嗰條鐵鏈好重，落喺腰間令人舉步為艱。佢話被黑布蒙頭後，對於有閃光燈同鏡頭極為接近拍攝感到躁動不安。到入「臭格」時仲面對狹小空間、氣味濃郁嘅惡劣環境，話第一次感受到時間流逝可以咁慢，每一秒都如坐針氈。

佢又話回想返嗰幾日嘅經歷，都有種消化不良、唔真實嘅感覺，當時都係靠諗起一首歌嘅歌詞，調整心態去面對喎。