政Whats噏：公開試壓力大有陰影　 還押李嘉達發考試噩夢

香港嘅教育制度一直為人詬病，唔少莘莘學子都會因為學習壓力大而發噩夢。而今年30歲嘅觀塘前區議員李嘉達，因為參與去年民主派「35+」初選，涉嫌違反《港區國安法》正被還押，最近幾個月竟然已經夢到4次關於公開試嘅噩夢添！

李嘉達嘅社交網站上載佢喺7月嘅獄中信，提到前排瞓得比平時好，不過適逢文憑試放榜前夕，佢竟然驚埋一份，夢到自己考香港高級程度會考(A-Level)喎，佢都話見自己已經30歲仲成日發有關嘅噩夢，可見香港嘅公開試壓力有幾大。

喺夢中，李嘉達同一班同學好似舊時準備A-Level一樣「寒窗苦讀」，佢感受到即將發生嘅公開試壓力，夢中仲問自己「我唔係已經讀完碩士課程咩……點解又要考A-Level？」就好似一直走不出公開試嘅輪迴咁啊！