政Whats噏：鄭松泰勸白鴿黨咪拖泥帶水　林卓廷留言掀罵戰

上個月畀資格審查委員會（資審會）裁定不符資格出任選舉委員會委員，仲即時被取消埋立法會議員資格（DQ）嘅鄭松泰，日前同傳媒總結5年議會生涯，承認當年倒插五星旗同區旗係最「低能」，跟住又「勸喻」民主黨（白鴿黨）唔好再喺參選事宜上拖泥帶水。點知泛民鬼打鬼，白鴿黨前副主席林卓廷竟然喺網上留言「哈哈哈」，隨即引發網民罵戰。

鄭松泰日前喺一個傳媒訪問中話自己「非藍非黃」，夾喺泛民同建制派中間，兩邊都唔討好。但佢喺2016年議員宣誓嗰陣倒插五星旗同區旗，招致建制派炮轟，仲承認呢件事係5年議會生涯入面「最低能」同「最小朋友」，對佢留低咗好深刻嘅教訓咁話。舊年泛民主派總辭，佢冇跟大隊同泛民一齊辭去議員職務，顯示出佢真係「夾心階層」，無論兩邊嘅關係都麻麻。

近排有建制派人士撰文話白鴿黨阻人參選有可能違反《港區國安法》，隨時死路一條。參選嘅問題，白鴿黨一直未解決，更因參選問題爆發內訌，黨內分主戰派同罷選派，唔知前路點行，要喺月底嘅特別會員大會上作決定。鄭就形容自己委曲求存都保唔住議員資格，叫白鴿黨喺參選問題上咪再拖泥帶水，否則「只會帶來一層一層嘅泥沼」。

呢番言論隨即惹起網上熱論，唔少網民留言撐鄭，而林卓廷亦有留言，就係「哈哈哈」。就因為呢3個字引發網民不滿。有網民鬧林係「垃圾」同「狗奴才」，「咪再食人血饅頭」。畀網民咁鬧，唔知林仲笑唔笑得出呢？

由於林涉及民主派35+初選案涉違《港區國安法》仍被還押，有網民就話監倉入面都可以玩手機，更有網民篤爆留言嗰個唔係林本人，而係佢個助理。

其實，白鴿黨呢排都自顧不暇，例如因違法佔領中環案被判囚8個月、獲緩刑2年嘅該黨副主席李永達，上個月離港赴英，惹起部分黨友不滿，有黨友更喺社交平台貼圖「叫人衝，自己鬆」，事後林卓廷及另一被還押嘅黨友兼前議員尹兆堅大發雷霆，尹更不點名炮轟該名黨友係契弟。係咪月底嘅特別會員大會就參選有決定，就可以平息內訌呢？大家要拭目以待嘞！