政Whats噏：寫錯國家全稱　港府全運會叨光變貽笑大方

香港代表隊在2020東京奧運「大豐收」，以1金、2銀、3銅，總共6面獎牌創下自1952年首度參與奧運以來最彪炳戰績，而緊接落嚟嘅賽事，就係喺陝西省西安市舉辦嘅第14屆全國運動會，港府當然想叨吓光啦，點知就失手收場。

事緣特首林鄭月娥今朝(14日)出席行政會議前，喺政府總部演講廳見記者，佢一開場就特別提到全運會，期間佢身後嘅布景板就寫有「齊心聚全運　同行建友誼」，可謂大力推廣。不過睇真啲，布景板原來出現錯字，仲要寫錯國家全稱添。

布景板將中華人民共和國寫成「中國人民共和國」，而第十四屆運動會就漏咗「全國」兩字！全運會係國家盛事，特區政府理應要小心辦事，唔好影衰國家先得㗎。何況港府近年積極推廣愛國教育，應該要以身作則，尊重國家，寫啱國家全稱應該都係基本要求啊。

特首辦回應指，對錯誤深表歉意，會採取措施防止出現同類情況。