政Whats噏:重投母校懷抱 雷雄德到教大任職

20210914
東網電視
更多新聞短片
年屆60嘅雷雄德放唔低教育事業,轉去教育大學執教鞭。
體育精神永不言休,年屆60嘅雷雄德早前告別工作咗28年嘅浸會大學,離開該校體育、運動及健康科學系副教授嘅崗位。不過,佢形容自己係勤力嘅小蜜蜂,點會捨得咁快退休,離開浸大之後佢重投母校,到教育大學健康及體育學系擔任高級講師啊。
雷雄德80年代畢業於教大嘅前身、羅富國師範學院及葛量洪師範學院,之後喺中學任教數年,後來遠赴籃球發源地、美國麻省春田大學攻讀理學學士、碩士及體育博士課程,學成回港任教。桃李滿門嘅雷雄德,近日開學後發現唔少健康與體育學系學生原來係佢嘅「徒孫」,薪火相傳嘅感覺令佢分外滿足。對於今次「轉校」,佢笑言葡萄牙球星C朗拿度早前回巢「發迹地」曼聯,自己就返去闊別多年嘅母校教書,感覺都好奇妙啊。
離唔開教育事業嘅雷雄德話,運動對於小朋友而言係生命教育,舉例話「毅」字有好多筆畫好難寫,咁要點教識小朋友呢?雷雄德話方法好簡單,只要放小朋友去沒有牆壁嘅課室、參加學校陸運會,佢哋喺運動場上就可以感受到毅力嘅意思喇。