政Whats噏：屯門區議會二度流會　未能選出新主席

早前政府要求區議員宣誓，有傳不能通過宣誓嘅區議員會被褫奪資格(DQ)及追討薪津，消息觸發民主派區議員辭職潮，人數高達260人，唔少區議會需要補選正副主席。而屯門區就有17人先後辭任，當中包括主席陳樹英。不過屯門區議會尋日(14日)舉行大會時，再次因人數不足而流會，到依家都未補選到區議會主席。

屯門區議會副主席黃丹晴尋晚喺社交平台發文，指尋日嘅屯門區議會大會流會，係繼7月23日屯門區議會特別會議流會後再一次流會。儘管作為副主席嘅黃丹晴承認自己責無旁貸，不過佢同時指出，流會主要源於建制派集體缺席。黃認為建制派集體缺席明顯係政治操作，對於有無信心下次會議開得成會，佢就話有信心同事會出席會議以履行區議會職能。

黃丹晴又指自己專登將有關修訂藍地及亦園分區大綱嘅議程調到尋日嘅區議會大會再討論，確保有足夠人數開會後，先至正式邀請村民及持份者到區議會列席進行申述，惟唔少村民為咗把握同政府官員對話嘅機會，即使尋日係平日，都特登請假以騰撥出時間列席會議，但最終會議就因為法定人數不足而再次流會，令佢覺得好似販賣咗一個假希望畀班村民。

黃又提到宣誓將至，區議會何去何從無人知曉，但佢會盡力利用議會剩餘嘅資源做嘢嘅，現時就希望趁住喺城規會諮詢完結前，仍然有少量時間可以召開會議，同時喺議會外嘅層面尋找空間，幫助村民及持份者。

屯門區議會經歷辭職潮之後，仍然在任嘅15名區議員中，11人屬民主派，餘下4名建制派區議員則為陳有海、賴嘉汶、劉業強以及蘇嘉雯，而尋日出席會議有7人，距離8人嘅會議法定人數僅差1人！換言之，屯門區議會嘅民主派區議員全部按時出席會議，根本唔可能流會，咁又點可以將責任推畀建制派呢？亦難怪黃丹晴會話自己責無旁貸啦！