政Whats噏：議辦停運　黃兆健要拆招牌

早前熱血公民主席鄭松泰被褫奪議員資格(DQ)，其後宣布解散熱血公民，而佢嘅黨友黃兆健亦都辭去區議員職務，叫做齊上齊落。不過黃辭職之後，連續兩個星期都忙到踢晒腳喎，事關佢要清空議辦同埋向街坊送月餅。今日(18日)佢就正式交還大埔議辦個舖位，拆埋上面個招牌，為一年半嘅區議員生涯畫上句號！

黃兆健近日頻頻喺Facebook上載自己執拾議辦嘅進程，包括搬走金錢樹、清理文具、出售剩餘物資等，去到今日終於告一段落，最後嘅動作就係卸下辦事處嘅招牌。雖然唔再係區議員，但黃兆健似乎仍相當忙碌，因為仲要幫手派散水月餅喎，話係街坊想佢親手送餅，之後佢會由大埔送月餅送到去油尖旺！

鄭松泰早前被DQ後轉行做運輸，首單「柯打」係運送玩具。儘管大家分屬黨友，鄭有車代步但黃就要做步兵，真係同人唔同命呢！